حوزہ نیوز ایجنسی کی رپورٹ کے مطابق، ملائیشیا کی اسلامی جماعت کے سربراہ عبدالہادی آونگ نے ایران کے خلاف جاری دباؤ اور کشیدگی کے تناظر میں کہا ہے کہ آج اسلامی جمہوریہ ایران کے دشمن درحقیقت اسی محاذ کا تسلسل ہیں جسے قرآن کریم نے "المغضوب علیہم" کے عنوان سے یاد کیا ہے۔
بین الاقوامی نشست "شہید بچوں، امریکی بالادستی کی ناکامی اور امتِ مسلمہ کی بیداری" سے خطاب کرتے ہوئے انہوں نے ایران کے عوام اور حکومت کے ساتھ یکجہتی کا اظہار کیا اور دعا کی کہ اللہ تعالیٰ انہیں بیرونی دباؤ، محاصرے اور جارحیت کے مقابلے میں استقامت اور کامیابی عطا فرمائے۔
عبدالہادی آونگ نے سورۂ حمد کا حوالہ دیتے ہوئے کہا کہ مسلمان روزانہ اپنی نمازوں میں اللہ تعالیٰ سے دعا کرتے ہیں کہ انہیں "مغضوب علیہم" کے راستے سے دور رکھے۔ ان کے بقول آج امتِ مسلمہ کے دشمن اسی فکر اور محاذ کی نمائندگی کرتے ہیں جس کے بارے میں قرآن نے خبردار کیا ہے۔
انہوں نے کہا کہ اللہ تعالیٰ کی رحمت اور نصرت ملتِ ایران کے شاملِ حال ہو اور پوری دنیا کے مسلمان ایران کی حمایت میں متحدہ مؤقف اختیار کریں۔ ان کے مطابق ایران کو درپیش چیلنج صرف ایک ملک کا مسئلہ نہیں بلکہ امتِ مسلمہ کے وسیع تر مفادات سے جڑا ہوا معاملہ ہے۔
انہوں نے اس امید کا اظہار کیا کہ اللہ تعالیٰ کے وعدے کے مطابق حق اور انصاف کی حمایت کرنے والوں کو کامیابی حاصل ہوگی۔ انہوں نے کہا کہ موجودہ حالات میں امتِ مسلمہ کو باہمی اتحاد، استقامت اور مشترکہ موقف اختیار کرنے کی ضرورت ہے۔
اپنی گفتگو کے اختتام پر انہوں نے قرآن کریم کی آیت «إِنَّ اللَّهَ لَقَوِیٌّ عَزِیزٌ» کا حوالہ دیتے ہوئے کہا کہ اللہ تعالیٰ یقیناً طاقتور اور غالب ہے، اور حق کے راستے پر چلنے والوں کی مدد فرماتا ہے۔
آپ کا تبصرہ